మధ్యే ..మధ్యే ..!

మధ్యవర్తులు పలువిధములు.
ఇరు పక్షాలను సానుకూలంగా ,సావధానంగా విచారించి ,ఆకుకు అందకుండా పోకకు కందకుండా,

సమన్వయ పరుస్తూ ,సమాధానపరిచే వారు కొందరు.

పిట్టా పిట్టా పిలవగానే వచ్చి,పోరును తీరుస్తానంటూ, పనిలో పనిగా,తమ దాహార్తినీ కక్కుర్తినీ తీర్చుకొనే తరహా కొందరు.

ఆ చివర ఈ చివర ,నిప్పు పెట్టి, ఆ కొలిమిని ఎగదోసి ,ఆ జ్వాలల వెలుగుల్లో, వినోదించే వారు మరికొందరు.

ఆ భగ భగ మండే మంటల్లో కి ఇరువురిని నెట్టేసి, “నా కడుపు చల్లగా” అనుకొంటూ,
తాము చల్లగా ,నిశ్శబ్దంగా తప్పుకొంటారు,ఇంకొందరు.

మరికొందరు చిక్కు ముళ్ళు పడ్డ వ్యవహారాన్ని ,ఆర్చడమూ తీర్చడమూ గట్టున పెట్టిస్తారు.ఇరువురి సున్నిత అంశాలను గుప్పిటలో పెట్టుకొని,ముళ్ళలా, బాకుల్లా , శూలాల్లా చేసి,చిత్రహింసలు పడుతూ, ఎదురు కట్నం గద్దించే ప్రబుద్ధవరాణ్యులు ఎందరో !

ఆ మహానుభావులందరికీ, ఓ దండం పెట్టి,మనం గ్రహించుకోవాల్సింది ,ఏమిటయ్యా అంటే,

“ఎవరి సమస్య వారు తీర్చుకోండి నాయనలారా…” అని !